ལས་ལ་རེམས།
གླུ་ཚིག མགར་གསེར་འོད།
གཞས་མ། གནམ་མཚོ།

གངས་ཅན་བོད་འདི་ཉི་ཟླའི་ཁྱིམ་ན་ཡོད།།
གནས་ལྔ་གཙུག་ལག་ཟུང་གི་གྲོང་ན་ཡོད།།
སྐད་ཡིག་རིན་ཆེན་གསེར་ནག་སེམས་ན་ཡོད།།
མེས་པོའི་རིག་གཞུང་སྲུང་བའི་ལས་ལ་རེམས།།

གངས་ཅན་བོད་འདི་གོ་ལའི་རྩེ་ན་ཡོད།།
གངས་རི་དཀར་ལ་ཆུ་བོ་དྭངས་ཤིང་གཙང་།།
སྤང་ལྗོངས་མཛེས་ལ་རྩྭ་ཐང་ཡངས་ཤིང་ཆེ།།
ཁོར་ཡུག་གཙང་དག་བྱེད་པའི་ལས་ལ་རེམས།།

གངས་ཅན་བོད་འདི་ཆོས་ཀྱི་ཞིང་ན་ཡོད།།
ལས་དང་རྒྱུ་འབྲས་བརྩི་སའི་ཡུལ་ན་ཡོད།།
བྱམས་དང་སྙིང་རྗེ་ལྡན་པའི་མི་རིགས་འདིའི།།
ཚེ་སྲོག་གཅེས་སྐྱོང་བྱེད་པའི་ལས་ལ་རེམས།།